TAFATEFO


غمي عيونك .. سد ودانك .. إفتح بقك .. قول حرفين

أنا فين؟

الشاطر فيكو .. يحزر فزر .. في دقيقتين

والأشطر منه .. اللي يحزرها .. فـ غمضة عين

والأشطر خالص .. ميحزرش .. يقول أنا فين؟

والأشطر أشطر .. اللي يبص يشوف بالعين

أنا فين ؟

فيه ناس اختلفت في الموضوع .. وحكاوي اتقالت عن مواضيع

والناس لا مؤاخذة في زمن الجوع .. يتعشوا كلام .. يفطروا تشنيع

فيه واحد شافني بلبده ولاسه في باب اللوق

والتاني لمحني بقفصين موز علي باب السوق

والتالت شافني في كاديلاك راكب مع بنتين

والرابع شافني فـ طنطا بابيع بلابيع ونشوق

وصحافة الصاوي .. والورداوي .. والجمال

.. وأباظه ولاظه .. وباقي الخفافيش والأندال

بتأكد جداً .. جداً جداً بالتدقيق .. إن أنا محبوس .. وباروح يومياً للتحقيق

طب أصدق مين ؟! وأكدب مين ؟!

ماهي حاجه تمخول أيها عاقل .. وأنا مجنون

وبأكلم نفسي .. وعقلي صراحه ماهوش مضمون

لو كنت بلبده ولاسه وماشي فـ باب اللوق .. طب إيه مشاني مفلس جداً جنب السوق ؟!

لوكنت بدأت .. كتاجر فاكهه .. وبقفصين ؟ مش كنت زماني معلم طمبه وجوز اتنين؟!

لوكنت فـ كاديلاك زي ما قال التالت بيه .. ومعايا بنات زي الشربات .. طب ح انزل ليه ؟!

لوكنت يا طنطا بابيع بلابيع وسُطَل وبخور .. مش كنت زماني مدير الجامع أو مأمور ؟!

وصحيح الصاوي .. والورداوي .. والجمال .. حابسين أفكار الناس في بلدنا .. وعال العال

إياك قاصدين إن أنا مسجون زي الملايين ؟

كده يبقي تمام .. ولأول مره .. باقول صادقين

بس أنا لا مؤاخذه وبالتدقيق .. ماحصلشي معايا ولا تحقيق !

مش حاجه تحير؟!

طب أنا فين ؟

حزرتوا خلاص ؟ فزرتوا خلاص ؟

عارفين .. أنا فين؟

أنا ساكن قلبي ومتونس بالناس .. والناس الونسه كتير

ماليين القلب وساندينه .. سارحين في الدم وفي التفكير

وجناين قلبي العمرانه .. بالناس .. الأزهار .. العصافير

سايعاني وسايعه اللي باحبه .. وتساعي معانا رفاقه كتير

شايفين انا فين ؟

الشاطر فيكو .. يحزر فزر .. في دقيقتين

والأشطر طبعاً .. حيحزرها في غمضة عين

أنا فين ؟!

4 تعليقات
  1. قول انتا الاول انتا فين

    انا عن نفسى فى عالمين منفصلين يوم ما عالم منهم بيزعلنى باخد عزويلى وحاجاتى ومحتاجاتى وحبايبى وحبيباتى
    وبيرو وبنعزل على العالم التانى

    يعنى من المحروسه للمحروسه يا عقلى لا تفكر


  2. بس انتا ايه حكاية الفيديوهات معاك

    انتا حقك كنت درست اخراج فى معهد سينما

    وشكرا جزيلا على الينك
    ربنا ميحرمناش من فيديوهاتك ولاا لينكاتك


  3. soly88 Says:

    نجم جميل ولكنه اصبح نجم
    والمصرى اصبح يخاف
    خايف على لقمة عيشه
    خايف على نفسه
    خايف على أولاده
    وخوفه مش خوف جبن بقدر ماهو ليس بيده شيىء يعمله


  4. فينك منذ امد يا رب تكون بافضل حال

    اتمنى اتطمن عليك قريب

    واتمنى انك تكون بافضل حال يا درش