TAFATEFO
نجيب الريحاني ........... بديع خيري مع ماري منيب


اتفرجت النهارده على فيلم " حسن ومرقص " لـ عمر الشريف و عادل إمام و يوسف معاطي و رامي إمام وأبطال تانيه.

أنا حبيت بس أحكي مشهد عجبني أوي أوي أوي .. والحوار بتاعه لزق في دماغي

عمر الشريف وأسرته - المسلمه المتخفيه في شكل أسره مسيحيه - (هناء الشوربجي وبنت حلوه أوي مش عارف اسمها ;) و عادل إمام وأسرته
- المسيحية المتخفية في شكل أسره مسلمه - (محمد إمام ولبلبه) كانوا بيتفرجوا على فيلم غزل البنات لـ نجيب الريحاني وبيضحكوا .. ودار الحوار القادم بين عمر الشريف (المسلم المتخفي في شكل مسيحي) وعادل إمام (القسيس المتخفي في دور مسلم) :
عمر الشريف : الرجل ده (يقصد الريحاني) أول ما تشوفه تضحك من غير ما يقول ولا كلمه.
عادل إمام : نجيب الريحاني كان بيكتبله كاتب عبقري اسمه بديع خيري. وفي يوم أم بديع خيري ماتت .. نجيب الريحاني راح يعزي لقى صوان وقرآن .. استغرب .. وسأل بديع .. هو انت مسلم .. قاله : آه .. قاله طب ومقلتليش ليه قبل كده؟ .. قاله بديع : أصلك مسألتنيش .. زمان أيام الزمن الجميل.
عمر الشريف : هو نجيب الريحاني مسيحي.
عادل إمام : آه.
عمر الشريف وشه اتغير للحظة .. وواتفرج على الفيلم وقاوم الضحك .. وبعدين كمل ضحك.

أما عن رأيي في الفيلم (وده انطباع شخصي وأنا معرفش حاجه عن النقد) .. فأنا عجبني الفيلم أوي بس في حاجات كتير اسوقفتني في الفيلم .. هقول حاجه واحده منهم (لأن أكيد سووو اللي بيعجبني أوي نقده للأفلام وتدويناته.. هيقول كل حاجه لما يشوف الفيلم) .. الحاجه دي هي:
ليه القصه مكانش فيها ناس مصريين عاديين ملهمش في التعصب ومفيش عندهم حاجه اسمها مسلم ومسيحي .. الفيلم طلع مصر كلها متنشنه ومتعصبه وصراعات وتحفز بين المسلمين ولمسيحيين في كل مكان .. مع ان ده والله ما صح .. ومشهد آخر الفيلم جايب الأسرتين بس ماسكين في ايد بعض وماشيين لوحدهم وسط الآلاف اللي بيدبحوا في بعض .. وييجي واحد يضرب عادل إمام (المسيحي) ويفضلوا ماسكين ايد بعض ومكملين .. وييجي واحد يضرب عمر الشريف (المسلم) ويفضلوا برضه ماسكين في ايد بعض ومكملين. ممكن يكون يقصد ان الوحده الوطنيه برضه ماشيه حتى وان تعرضت لمناوشات وعراقيل وأذى من أي من الطرفين .. بس بصراحه وجعتني أوي بجد انه جابهم هما بس اللي معتدلين ومصريين .. وخلاهم وسط غابه من البشر بيدبحوا في بعض.

عجبني طبعا طبعا عادل إمام .. وكان واحشني جدا جدا عمر الشريف (وبفرح جدا لما بشوفه زي في حواره مع عمرو أديب .. ولما بيمثل بتبقى فرحه أكبر بكتير وخصوصا أفلام عربيه) .. وعجبني قصة وحوار يوسف معاطي (ما عدا النقطة اللي فاتت) وعجبني برضه (وإن كنت مبفهمش في الإخراج) رامي إمام ( ما عدا إصراره على عمل لقطات جرافيك طبعا غير متقنه زي مشهد إنفجار العربيه وإنفجار القنبله). معجبنيش أوي محمد إمام اللي بحس انه بيقلد عادل إمام زمان (وخصوصا انه شبهه وبرضه خصوصا في مشاهد الوقوع) وعجبتني أوي (مش تمثيلا قصدي عادي كده) فاطمه بنت عمر الشريف اللي مش عارف إسمها ايه مع اني شفتها كتير وشفتها قريب في فيلم كلاشينكوف :D .. هي حلوه أوي بس قصيره شويه. lol
Labels: | edit post
2 تعليقات
  1. غير معرف Says:

    شيرين عادل

    ده اسم الممثلة اللي عملت دور بنت عمر الشريف


  2. TAFATEFO Says:

    آه .. جميله أوي ما شاء الله